XYA'AXCHE'
A bo'oybesmaj u k'ubeen ch'íich',
ti u jujkintmaj ta keléembal u ch'i'ibal máaxo'ob mina'an u taanajo'obe',
bey a wíinikkuunsik u k'aba'ob ichil u ya'axil Yuum K'áax búukbesik a bak'el,
utial a k'amik u yóol Yuum K'iin tep'ik u ke'elilo';
le óolal chen sáasake' u k'uchmabáa yétel u ki'ibokil u lool xso'ole aak',
le ken u pakteche' jun taats' u bin u yej u yich tu xch'úupalil a puksi'ikal,
u xtáabaayil u náay,
le beetik u muuk' a wooke' ku suut u xmajannajil u méek'.
CEIBA
Tu sombra ha protegido hasta la última pluma del ave migrante,
Descansas en tu regazo la estirpe del forastero
Tus verdes venidos de Yuum K’áax dignifican su nombre,
Recibes el aliento de Yuum K'iin para cobijar su frío,
Perfumas su color al amanecer humedecido de xso’ole áak,
Aceptas su discreta mirada a la mujer escondida en tus pechos,
Aquella xTáabay de sus sueños,
Donde la ubicuidad de tus piernas, lo conviertes en el asilo político de sus alas.
