Jeeléeb / U bóoxel a chi’

Jeeléeb

Uaxaklajun u téenel a jeléebtkabal,

Tun puts’bal u ts’a’ayil a chuuk,

Tun mu’uk’a’antal u t’e’et’il a ka’anal-ichil,

Tun jojopaankil u xokchuuyil a wiipíil,

Tun k’abilaankil u ki’il a xtáabsaj chi’,

Tun tsatsajaankil u tsáabil a xch’uplaankil,

Min taak a jáapik u chan t’u’ulil in su’lakil.

U bóoxel a chi’

Ku t’a’absik in chokwil chéen in k’a’ajsik,

U chakjole’enil e’esik bix máanaja’aníl k’ulu’i’,

U siip’il e’esik bix xíimbata’anil tumen ooch,

U pa’apa’ak’il e’esik bix xanabcha’ata’anil tumen k’aykuuts,

U k’óomk’omil e’esik bix buk’la’anil tumen páay-ooch,

U xi’ixi’ikil e’esik bix beelinta’anil tumen chab,

U múumulil e’esik bix kajkuunta’anil tumen u k’ab baj,

Min le beetik pajchaján in tuukul.

Poemas publicados en la Revista Electrónica Sinfín #21

http://www.revistasinfin.com/poesia/jeeleeb-u-booxel-chi/